A nave industrial de Finsa encóntrase no polígono industrial de San Cibrao das Viñas e conta cun emprazamento protagonista, ben pola súa escala respecto das edificacións na súa contorna, ben pola súa orientación.

A proposta que se fai para a reconversión duns espazos de relación e reunión, conta cunhas liñas claras e lexibles, que se traducen en espazos versátiles e fluídos, onde a materia prima protagonista é a madeira, en diferentes formas de aplicacións.

Así o aspecto exterior do edificio no que se intervén trata de amosar un carácter representativo para a marca Finsa, creando unha fachada recoñecible cunha gran cuberta en madeira.

Tanto o espazos exteriores coma interiores, atópanse degradados e pouco valorados, polo que a proposta intenta potenciar tódalas virtudes coas que conta o lugar, e trátase tamén de aportar valor engadido mediante o uso de materiais e técnicas construtivas coas que Finsa está amplamente familiarizada, potenciando a innovación no deseño, uso e tratamento de materias.

• A planta baixa conta cun complexo programa funcional que se trata de resolver cun «xesto» que vertebra os espazos sen necesidade de zonificar mediante tabiques, senón co propio mobiliario, ou cos pavimentos diferenciados, resultando un espazo con profundidade, que invita a ser percorrido e que goza de boa calidade lumínica e espacial.

A proposta trata tamén de potenciar a relación interior-exterior, aproveitando a zona exterior como espazo de relación e de ocio para momentos determinados, dándolle así fluidez aos espazos e aproveitando ao máximo a captación solar debido a boa orientación coa que conta a edificación na que se intervén.

• A planta alta utilízase para a zona máis relacionada co día a día de Finsa e os seus traballadores, sendo este un espazo cunha atmosfera de traballo onde a madeira é materia prima protagonista.

Co mesmo criterio  xeral da proposta, un muro panelado en madeira sinuoso actúa a modo de xerador de espazos, sen necesidade de ter como resultado un espazo cheo de portas e tabiques, que diminuirían a fluidez do espazo, mantendo unha estéticas acorde coa da planta baixa.

O programa funcional requirido nesta planta conta con varias salas de reunión de diferentes tamaños, tamizados visualmente cunhas estruturas lixeiras de madeira respecto da zona de traballo e de relación que da cara o exterior.

Colaborador especial: Iago Pérez Fernández